Loading...
Cun agid da strategias d’organisaziun san ins structurar ed organisar la nova savida. Quei fan ins cun colligiar las differentas enconuschientschas ina cun l’autra e metter tut en in pli grond context. Quella survesta structurada gida a clamar giu informaziuns sco era a colligiar novas enconuschientschas cun savida gia existenta. Igl ei denton impurtont d’organisar bein quellas enconuschientschas e da reducir las informaziuns agl essenzial, perquei che nossa capacitad da memorisar ei restrenschida. Per quei motiv san ins era discuorer dalla strategia d’organisaziun reductiva.
Dapli informaziuns davart strategias d'organisaziun concretas anflas ti els videos sutvart.
Dalla metoda da KaWa (Kreative Analografie, Wortassoziationen) san ins far diever per activar la presavida ni per repeter
ina tematica. Ins sa denton era nezegiar ella dafertontier ed adina puspei
aschuntar il maletg cun novas enconuschientschas. Il grond avantatg da quella strategia
d’emprender ei ch’ins fa automaticamein uorden culs differents cavazzins e notescha
mo igl impurtont.
El center d’in mindmap stat adina la noziun superiura respectivamein il tema. Entuorn quella noziun vegnan cavazzins impurtonts notai, colligai e cavigliai. Quei vegn fatg cun agid da roms principals, roms laterals e frastgas. Ei fa senn da cumpletar quellas noziuns cun maletgs e simbols. La finamira d’in mindmap ei da resumar fatgs en ina structura surveseivla.
Tier quella strategia vegnan all’entschatta tut ils cavazzins davart ina tematica rimnai. Silsuenter vegn ei mirau tgei noziuns ch’ein gia enconuschentas e nua ch’ei dat aunc confusiuns. La finamira ei d’enconuscher e da saver explicar la muntada da tuttas noziuns.
Quella strategia sebasa sin la metoda da sortir. Suenter che tut las noziuns ein claras ed enconuschentas, emprov'ins da colligiar ellas ina cun l’autra e da structurar l’entira tematica. Tier quella metoda va ei buca per haver endretg ni falliu – l’argumentaziun quenta. Cun argumentar daco ch’ins ha ussa exact cavigliau las noziuns aschia e buc auter vegn l’entira tematica numnadamein aunc inagada repetida e consolidada.